На вуліцы – непагадзь, зімовая сцюжа. Адчыняюцца дзверы СШ №2 г. Барысава – і адразу трапляеш у атмасферу ўзрушанасці і цеплыні, якая зыходзіць ад дзіцячых усмешак. Сённяшнюю ўзрушанасць можна было адчуць з нагоды святкавання Міжнароднага дня роднай мовы. Гэта свята спрыяе таму, каб людзі задумаліся пра лёс роднай мовы, на якой размаўлялі іх продкі.
У гэты дзень у нашай школе ўжо традыцыйна праводзіліся акцыі “Гавары са мной па-беларуску”, “Папацей, грамацей!” – напісанне дыктоўкі для педагогаў і вучняў. Вялікай папулярнасцю карысталася майстэрня “Беларускі арнамент”. Былі наладжаны музычныя перапынкі з удзелам школьнага аркестра. Удзельнікі лектарскай групы завіталі ў кожны клас і правялі з вучнямі займальныя віктарыны.
Сёння мы можам многім ганарыцца. Як цывілізаваная краіна, у нас ёсць свая Канстытуцыя, свой сцяг, герб. Для таго каб народ лічыўся цывілізаваным, неабходна, каб ён ведаў свае карані, сваю мову. Яшчэ Францішак Багушэвіч казаў: “Калі памірае мова – памірае народ”.
Давайце і мы задумаемся пра будучыню беларускай мовы. Размаўляйце па-беларуску, не саромейцеся недасканалай гаворкі. Мова жыве там, дзе ёсць людское жаданне.
Настаўнікі беларускай мовы і літаратуры